Районда мәктәпләр арасында иң оста оя ясаучыларны билгелиләр. Быел барлыгы 100 дән артык эшне кабул иткәннәр. Бәйгене мәгариф идарәсенең мәктәптән тыш эшләр үзәге белән "Балтач" тыюлыгы хезмәткәрләре белән бергәләп оештыра. Матур гамәлнең барлыкка килүенә ун елдан артып киткән инде.

– Экологлар җиңүчеләрне ояның матурлыгына гына түгел, ә аны дөрес итеп ясауга, кошларга ни дәрәҗәдә уңайлы булуына да игътибар итә, – ди мәктәптән тыш эшләр үзәге методисты Римма Бариева. – Бер генә мәктәп тә читтә калмый, быел да 21се дә үз өлешен кертте. Конкурс әти-әниләр белән балаларны берләштереп тора. Әлеге эшләрне гаиләләр белән башкаручылар да бар. Соңгы вакытта ниндиләрен генә ясамыйлар. Уйлап табу осталыкларына исең китә. Бу – үзе бер сәнгать.

Мәчет, гитара, ябалак формасындагылары да бар. Сыерчыкларның өйләре заманча хәзер. Укучыларның матурлыкны күрә белүенә сөенәбез. Ә ояларны экологлар укучылар белән урманга, тыюлыкларга эләчәк. Шулай итеп, сыерчыкларга бала чыгару өчен оялар саны арта бара. Быел әле үзем сыерчыкларны күрмәдем, әмма инде җылы яктан кайтканнар дип ишеттем.