Тиешле карарга республика Премьер-министры Алексей Песошин кул куйган. Документ рәсми хокукый порталында дөнья күргән.

Яңа тәртип буенча, 2025 елда “Иң яхшы укытучы” республика конкурсында җиңгән педагоглар эшләгән мәктәп директорлары 30 мең сум күләмендә бер тапкыр бирелә торган түләү алачак.

Бу чара башлангыч, төп һәм урта гомуми белем бирү программаларын гамәлгә ашыручы мәктәп җитәкчеләренә кагыла. Ягъни, әгәр мәктәп укытучысы һөнәри бәйгедә җиңү яулый икән, директорга да өстәмә премия каралган.

Түләүләр 2026 ел бюджеты хисабына финансланачак.

Хакимият вәкилләре фикеренчә, бу карар мәктәп җитәкчеләрен педагогларның һөнәри үсешен активрак хупларга этәргеч булырга тиеш.

Билгеле булганча, Татарстанда «Яшьләр һәм балалар» илкүләм проекты гамәлгә ашырыла.