Хокук саклау органнары хезмәткәрләре Бардинны кичә тоткарлап, сорау алганнар. Ул бер ел элек читтән торып кулга алынып, халыкара эзләүгә игълан ителгән.

Агентлык мәгълүматлары буенча, Бардин җинаятьчел төркем лидеры булган һәм урланган акчаның күбесе шуңа юлланган.

Игорь Бардинның улы Владимир да Лобня җинаятьчел төркеменә кергән һәм Россия хәрбиләренең акчасын урлап йөргән. Анысы узган елның октябрендә кулга алынган.

Тикшерүчеләр мәгълүматларына караганда, җинаятьчел төркемгә кимендә 40 кеше кергән. Алар Шереметьево аэропортына килеп төшкән СВО хәрбиләренең акчаларын үзләштергән.

Банда әгъзалары, хәрби хезмәткәрләрне махсус эзләп, аларга такси хезмәте тәкъдим иткәннәр. Башта тиешле күләмдә акча сораганнар, әмма соңыннан сумманы кинәт арттырып, ике меңнән 40-90 мең сумга кадәр җиткергәннәр. Түләүдән баш тарткан хәрбиләргә янаганнар.