NASA біздің планетамыздан 3 млрд км қашықтықтағы Бенну астероидынан үш апта бұрын Жерге жеткізілген топырақ талдауының алғашқы нәтижеcін жариялады. Жұлдызаралық шаңның химиялық құрамын зерттеу нәтижесі онда көміртек пен су мөлшері көп екенін көрсетті, деп хабарлайды Kazinform агенттігі ВВС жаңалықтарына сілтеме жасап.

Сараптама жүргізген Аризона университеті ғалымдары бұл жаңалық тіршіліктің әу баста біздің планетада пайда болмағанын, Жерге ғарыштан әкелінді деген гипотезаны жанама растайтынын айтты.

Астероидқа саяхат төрт жылдан астам уақытқа созылды.

NASA-ның OSIRIS-REx миссиясы 2016 жылдың қыркүйегінде іске қосылғанымен, құрылғы көздеген жерге 2020 жылдың қазан айында жетіп, топырақ үлгілерін жинады.

Осириске оралу үшін тағы үш жыл қажет болды.

Құнды жүк Юта шөліне жеткізіліп, Техас штаты Джонсон қаласындағы NASA зертханасына талдауға жіберілді.

«Бұл — Жерге әкелінген ең үлкен және көміртегіне бай астероид үлгісі», — деді NASA әкімшісі Билл Нельсон.

Оның химиялық құрамы әлдеқайда қызық.

Нельсонның айтуынша, үлгідегі көміртегі мөлшері жалпы салмақтың 5%-ын құрайды және тек минералды түрде ғана емес, сонымен қатар күрделі органикалық қосылыстарда да табылған.

Ғалымдар бастапқыда болжағандай, су саз минералдарының кристалдық құрылымында «қамалып» қалған.

Бір нұсқа бойынша, жер бірден «көк планетаға» айналған жоқ: мұхиттар, теңіздер, өзендер мен көлдерді құрайтын судың барлығы дерлік 4-4,5 млрд жыл бұрын біздің планетамыз астероидтармен жаппай бомбаланған кезде ғарыштан жеткен.

Зертхана ғалымдары бұл зерттеудің бастамасы екенін атап өтті.

Жұлдызаралық шаң түйіршіктері әлі талай құпияны ашуы мүмкін.

Сондықтан әкелінген үлгінің үштен бір бөлігі кішірек бөліктерге бөлініп, одан әрі зерттеу үшін дүние жүзіндегі ондаған зертханаларға жіберіледі.

Бұған дейін Бенну астероидынан топырақ әкеле жатқан капсула Жер бетіне аман-есен қонғанын жазған болатынбыз.