Без әлеге сорауларны район Советы аппаратының оештыру-гомуми бүлеге җитәкчесе Гүзәл Гаптрахмановага юлладык.

– Әлеге игелекле эш белән Татарстан Республикасы Фәннәр академиясе каршындагы М.Хәсәнов исеменедәге татар энциклопедиясе институты шөгыльләнә. Әлеге мәсьәләгә багышланган җәмәгатьчелек вәкилләре катнашында берничә киңәшмә үткәрелде, эшче төркем төзелде.

Хәзерге вакытта энциклопедияне төзү буенча эш дәвам итә, шактый материаллар тупланды, дип беләм. Авылларда бу юнәлештә бик актив эшлиләр. Авыл җирлекләре каршында да эшче төркемнәр төзелде. Алар составында тарих укытучылары, мәктәпләрдәге музей җитәкчеләре, китапханәчеләр бар.

Шәһәр буенча материаллар туплау проблемалырак. Без районның һәр предприятиесе, оешмасы җитәкчеләренә энциклопедиягә кертү өчен материаллар җибәрүне сорап хатлар җибәрдек. Бергәләп эшләгәндә генә әлеге китап тулы һәм киләчәк буыннар өчен дә кыйммәтле басма булачак.

Район буенча материаллар туплау өчен “Казан арты” музее җаваплы, булган сорауларны 3-06-79 телефоны буенча бирә аласыз. Энциклопедиядә районыбыз тормышына лаеклы өлеш керткән һәркем үз урынын алырга тиеш, – диде ул.